"Яшь программист" республика конкурсы

"Байтик" лагеренда мәктәп укучылары һәм студентларның XX "Яшь программист" республика конкурсы үткәрелде. сайтым белән мин "Web- сайтлар һәм SaaS технологияләр" номинациясендә катнаштым. "Интернет челтәрендә татар сегментын үстергән өчен"
ТР Мәгариф һәм фән министрлыгының Мактау Грамотасы белән бүләкләндем.

Без- варислар сафында!

Илфар Фаррахов исемендәге варислар оешмасында тантаналы сбор үткәрелде.Ул укучыларны варислар сафларына кабул итүгә багышланды. Без- булачак варислар, сборга алдан әзерләндек. Татарстан варислары берлегенең тарихын, законнарын, биеклекләрен өйрәндек. ТВБ законнарын үтәргә вәгъдә бирдек. Тәрбия эшләре буенча директор урынбасары Фаррахова Р.Г., класс җитәкчебез Шакирянова З.Ә.,педагог-оештыручы Хәкимова Г.Ш. варис булуыбыз белән котлап, уңышлар теләделәр һәм бүләкләр тапшырдылар.

Яңа уку елы белән!

Без инде хәзер  үстек,
Бишенчегә дә күчтек.
Яңа уку елы белән, дуслар!!!

Туган як музеена экскурсия

Лагерьдагы иң истәлекле көннәрнең берсе районыбыздагы туган як музеена экскурсиягә бару булды. Музей директоры Синара апа Яббарова безне ачык йөз белән каршы алды. Музей бүлмәләре һәм андагы экспонатлар белән танышу безнең күңелләрдә  җирлегебез тарихы белән кызыксыну уятты. Музеебызның шундый бай, матур булуы сокландырды. Экскурсия оештырганнары өчен вожатый апаларыбызга, директорыбыз Илдар абый Мубараковка зур рәхмәт.

Исәнме, лагерь!!!

Мәктәптә укулар төгәлләнүгә, без мәктәп яны лагерена ял итәргә җыелдык. Лагерь тормышы бик күңелле. Безне әле алда  кызыклы һәм мавыктыргыч чаралар көтә. 

Җиңүгә - 71!

Быел илебез халкы Бөек Җиңүнең 71 еллыгын билгеләп үтте. Шул уңайдан авылыбызда митинг үткәрелде. Мәктәп укучылары бәйрәмгә багышлап монтаж куйды.Бөек Ватан сугышында батырларча һәлак булганнар истәлегенә обелискка венок куйдылар.Бәйрәмгә килгән  ветераннар безгә тырышып укырга, тынычлыкның кадерен белергә кушты.

"Чиста Мөслим" акциясе

"Чиста Мөслим" акциясенә кушылып, без дә мәктәп территориясен җыештырырга чыктык. Мәктәп укучылары барысы да тырышып эшләде. 

"Мин Тукайны яратам" иҗат бәйге-фестивале

"Мизгел" яшьләр үзәгендә "Кадрлар резервы" республика проекты кысаларында Габдулла Тукайның 130 еллыгына багышланган "Мин Тукайны яратам" иҗат бәйге-фестивале үткәрелде. Фестивальдә интернет челтәренә #МинТукайныЯратам# хештегы аша куелган чыгышлардан  шигырь, җыр, рәсем номинацияләре буенча сайлап алынган укучылар катнашты. Бу чарада безнең мәктәп укучылары да бик актив булдылар. Егетләр триосы( Әхмәтгалиев Р., Шакирянов Р., Шамс А.), Бәдретдинова А., Холбутаева Н., Шамс А., Хәкимов Д. уңышлы чыгыш ясадылар. Бәдретдинова Алисә җыр номинациясендә 2 нче урын яулады. Афәрин!

Язучылар белән очрашу

10 март көнне мәктәбебездә Чаллы язучылары якташыбыз Г.Исхакый исемендәге премия лауреаты, "Көмеш кыңгырау" газетасының баш мөхәррире Факил Сафин, М.Кашгарый бүләге иясе, "Казан утлары" журналының әдәби бүлек мөхәррире Айгөл Әхмәтгалиева, шагыйрә Әлфия Ситдиковалар белән очрашу булды. Кичә укучыларның шигырь-җырлары  белән үрелеп барды. Әдипләр укучыларны кызыксындырган сорауларга җавап бирделәр,  мәктәпкә үзләренең китапларын бүләк иттеләр. " Көмеш кыңгырау" газетасының актив хәбәрчесе Холбутаева Наиләгә диплом тапшырылды.Язучылар белән аралашу күңелдә җылы тәэсирләр калдырды.

Шашка , шахмат ярышы

Бүген мәктәптә шахмат-шашка ярышы булды. Нәтиҗәләр түбәндәгечә: кызлар арасында шашка ярышында Сөләйманова Ләйсән-1, Холбутаева Диләрә-2, Яруллина Роза-3 урынны яулады. Малайлар арасында Насибуллин Азат-1, Суфиев Рәзил-2, Хәкимов Денис-3 урында. Шахмат ярышы нәтиҗәләре түбәндәгечә: кызлар арасында Холбутаева Наилә-1, Буринскас Юстина-2, Лысова Настя-3 урында, малайлар арасында Шамс Айрат-1, Миркәев Шамил-2, Якупов Илдар-3 урынны бүлештеләр. Котлыйбыз!

Рус теле атналыгы

25 гыйнвардан мәктәбебездә рус теле атналыгы башланды. Бу көнне башлангыч класс укучылары өчен "Табышмаклар иленә сәяхәт" кичәсе үткәрелде. Кичәне укытучыбыз Шаймарданова Рузалина Гаязетдиновна үткәрде.